Dec 31, 2021

ഹോം-സ്കൂളിങ്ങിനെ അടുത്തറിയാം

3
 
1.0×
--:--
--:--
Open in playerListen on);
Episode details
Comments

സാധാരണക്കാർക്ക് ഹോം-സ്കൂളിംഗ് എന്ന വിദ്യാഭ്യാസരീതി എത്രത്തോളം പരിചിതമാണെന്നത് അറിയില്ല. എന്നാൽ ഇന്ത്യയിൽ ഹോം-സ്കൂളിംഗ് നിയമവിധേയമായതുകൊണ്ട് തന്നെ 2015ന് ശേഷം ഹോം-സ്കൂളിംഗ് നടത്തുന്ന കുട്ടികളുടെ എണ്ണത്തിൽ കാര്യമായ വർധനവുണ്ടായിട്ടുണ്ട്. കേരളത്തിലും നിരവധിക്കുട്ടികൾ ഹോം-സ്കൂളിംഗ് രീതി പിന്തുടർന്ന് വരുന്നു.

ഈ കോവിഡ് കാലത്ത് സുരക്ഷയെ മുൻനിർത്തിയോ മറ്റ് പല കാരണങ്ങൾ കൊണ്ടോ മക്കളെ സ്കൂളിലയക്കാൻ മടിക്കുന്ന മാതാപിതാക്കൾക്ക് പ്രാവർത്തികമാക്കാൻ സാധിക്കുന്ന വിദ്യാഭ്യാസരീതിയായതുകൊണ്ട് തന്നെ നമുക്ക് ഹോം-സ്കൂളിങ്ങിനെ ഒന്നടുത്തറിയാം.

എന്താണ് ഹോം-സ്കൂളിംഗ്?

സാധാരണയായി നമ്മുടെ നാട്ടിൽ കുട്ടികളുടെ ഒഫിഷ്യൽ വിദ്യാഭ്യാസ ജീവിതം ഏകദേശം നാല് വയസ്സിൽ എൽ കെ ജി/കെ ജി ക്ലാസ്സിലൂടെ ആരംഭിക്കുന്നു.

മാതാപിതാക്കൾ ജോലി നോക്കുന്നവരാണെങ്കിൽ വളരെ മുൻപ് ഡേ-കെയറിലും പ്ലേയ് സ്കൂളിലും/കിൻഡർഗാർട്ടനിലും സമയം ചെലവഴിക്കുന്ന കുട്ടികൾ ധാരാളം ഉള്ളപ്പോഴും, നാട്ടിൽ പുറത്ത് ഇപ്പോഴും തുടരുന്ന അംഗൻവാടികളും ആധുനിക വിദ്യാഭ്യാസത്തിന്റെ തന്നെ ഭാഗമായ പ്രി-കെജി ക്ലാസ്സുകളും ഒക്കെ നിലനിൽക്കുമ്പോഴും, ഇന്ത്യയിൽ നിലവിലുള്ള വിദ്യാഭ്യാസ സമ്പ്രദായത്തിൽ എൽ കെ ജി/കെ ജി ക്ലാസ്സിലൂടെയാണ് ഒഫീഷ്യൽ വിദ്യാഭ്യാസത്തിന് സ്കൂളുകളിൽ ആരംഭം കുറിയ്ക്കുന്നത്.

എന്നാൽ പല കാരണങ്ങൾ കൊണ്ടും സ്കൂൾ വിദ്യാഭ്യാസ രീതിയിലേക്ക് കുട്ടികളെ അയക്കുന്നതിന് പകരം കുട്ടികളുടെ ഏറ്റവും വലിയ കംഫർട്ട് സോണെന്ന് വിശേഷിപ്പിക്കാവുന്ന സ്വന്തം വീട്ടിൽ മാതാപിതാക്കളുടെ നേതൃത്വത്തിൽ കുട്ടികളുടെ പഠനം മുന്നോട്ട് കൊണ്ടുപോകുന്ന രീതിയാണ് ഹോം-സ്കൂളിംഗ് എന്നറിയപ്പെടുന്നത്.

ഈ രീതിയിൽ പഠനം തുടരുമ്പോൾ ഒരു സ്റ്റേജിലും കുട്ടികൾ നേരിട്ട് സ്കൂളിൽ പോകേണ്ടതില്ല.

മറിച്ച് സ്വന്തം വീടുകളിലിരുന്ന് മാതാപിതാക്കളുടെ അതല്ലായെങ്കിൽ പഠനത്തിന് നേതൃത്വം നൽകുന്ന മറ്റൊരാളുടെ ശിക്ഷണത്തിൽ പഠനവുമായി മുന്നോട്ട് പോകുന്നു.

ഹോം-സ്കൂളിംഗിന്റെ ചരിത്രം

ലോകചരിത്രത്തിൽ ഹോം സ്കൂളിന്റെ പ്രാധാന്യം തിരിച്ചറിഞ്ഞിട്ട് ഏറിയാൽ 50 കൊല്ലങ്ങൾ മാത്രമേ ആയിട്ടുള്ളൂ. ജോൺ ഹോൾട്ട്, റയ്‌മണ്ട് മൂർ, ഡോറോത്തി തുടങ്ങിയ പ്രശസ്തരായ ചില എഴുത്തുകാരും ഗവേഷകരും വിദ്യാഭ്യാസ പരിഷ്കരണത്തെ കുറിച്ച് എഴുതാൻ തുടങ്ങിയതിലൂടെ 1970-കളിലാണ് അമേരിക്കയിൽ ജീവിക്കുന്ന മനുഷ്യരിൽ ഹോം-സ്കൂളിംഗ് എന്ന ആശയത്തിന്റെ വളർച്ച ആരംഭിക്കുന്നത്. നിലവിലുള്ള വിദ്യാഭ്യാസരീതിക്ക് ഒരു ബദൽ വിദ്യാഭ്യാസ ഓപ്ഷനായി അവർ വീടുകളിലിരുന്ന് കുട്ടികൾ പഠനം ആരംഭിക്കുകയും തുടരുകയും ചെയ്യുന്ന രീതി അഥവാ ഹോം-സ്കൂളിംഗ് നിർദ്ദേശിക്കുകയായിരുന്നു.

അമേരിക്കയിലെ നാഷണൽ ഹോം എജുക്കേഷൻ റിസർച്ച് ഇൻസ്റ്റിറ്റ്യൂട്ടിന്റെ കണക്കനുസരിച്ച് അമേരിക്കയിൽ ഇപ്പോൾ രണ്ട് ദശലക്ഷത്തിലധികം കുട്ടികൾ ഹോം-സ്കൂളിംഗ് നടത്തുന്നുണ്ട്.

ഓരോ വർഷവും ഈ ശതമാനം അതിവേഗം ഉയരുന്നു. അമേരിക്കയെ മാറ്റി നിർത്തിയാലും ഏകദേശം എല്ലാ വികസിത രാജ്യങ്ങളിലും ഹോം-സ്കൂളിംഗ് നിയമം അനുവദിച്ചിട്ടുള്ളതും വേഗം വളരുന്നതുമായ പഠനരീതിയാണ്.

ഇന്ത്യയുടെ പഠനരീതിയുടെ ചരിത്രം

ഇന്ത്യയുടെ ചരിത്രത്തിൽ ആദ്യകാലത്ത് നിലനിന്നിരുന്ന വിദ്യാഭ്യാസരീതി ഗുരുകുലവിദ്യാഭ്യാസമാണ്. ഗുരുവിനോടൊപ്പം താമസിച്ച്, അദ്ദേഹം കൈവശമാക്കിയിട്ടുള്ള അറിവുകൾ ഗുരുവിൽ നിന്നും സ്വായത്തമാക്കുക എന്ന രീതിയായിരുന്നു അത്. പലവിധത്തിലുള്ള സ്കില്ലുകളും, അതിജീവനത്തിനായുള്ള വഴികളും ഗുരുകുല വിദ്യാഭ്യാസരീതിയിൽ ഉൾപ്പെട്ടിരുന്നു. ഏതെങ്കിലുമൊരു മരത്തണലിലോ ഉദ്യാനത്തിലോ സമയം ചെലവഴിച്ചുകൊണ്ടാണ് പഠനം നടന്നിരുന്നത്. എന്നാൽ വിദ്യാഭ്യാസജീവിതം ആരംഭിക്കുന്നതിനുള്ള പ്രായത്തിലെത്തിയാലും എല്ലാ കുട്ടികൾക്കും ഒന്നുപോലെ അത് ലഭിച്ചിരുന്നില്ല എന്നതാണ് ഗുരുകുല വിദ്യാഭ്യാസരീതിയുടെ ഏറ്റവും ദുഖകരമായിരുന്ന വശം. വിദ്യാഭ്യാസം നേടുന്നതിനുള്ള യോഗ്യതയായി അന്ന് കണക്കാക്കപ്പെട്ടതൊക്കെയും മനുഷ്യനെ അന്നത്തെ സാമൂഹ്യ വ്യവസ്ഥയുടെ അടിസ്ഥാനത്തിൽ തരം തിരിച്ച് മുൻപന്തിയിൽ നിർത്തിയിരുന്ന വസ്തുതകളുടെ മാത്രം അടിസ്ഥാനത്തിൽ ആയിരുന്നു. കാലാകാലങ്ങളോളം തുടർന്ന് പോന്നിരുന്നത് ഇതേ വിദ്യാഭ്യാസരീതിയാണ്.

ഇന്ത്യയിൽ ഇന്ന് തുടർന്ന് പോകുന്ന മോഡേൺ സ്കൂൾ സിസ്റ്റത്തിന് തുടക്കം കുറിയ്ക്കുന്നത് 1830 ൽ ലോർഡ് തോമസ് ബബിങ്ടൺ മകൗലേ എന്ന വ്യക്തിയാണ്. മോഡേൺ വിദ്യാഭ്യാസ രീതിയിലൂടെയാണ് സ്കൂൾ, ക്ലാസ്സ്‌ മുറികൾ, അധ്യാപകർ അഥവാ ടീച്ചേഴ്സ്, വിദ്യാർഥികൾ അഥവാ സ്റ്റുഡന്റ്‌സ് എന്നിങ്ങനെയുള്ള കോൺസെപ്റ്റുകൾ ജനിക്കുന്നത്. തുടർന്ന് മോഡേൺ സ്കൂൾ സിസ്റ്റം ശക്തമായി മുന്നോട്ട് വളർന്നു.

ഹോം-സ്കൂളിംഗ് ഇന്ത്യയിൽ

ഇരുപതാം നൂറ്റാണ്ടിന്റെ ആദ്യകാലത്ത് തന്നെ വ്യത്യസ്തങ്ങളായ പഠനരീതികൾ ഉപയോഗപ്പെടുത്തുന്നതുമായി ബന്ധപ്പെട്ട് തിയറിസ്റ്റുകൾ പഠനങ്ങളും ശ്രമങ്ങളും നടത്തിയിരുന്നു. അതിനെതുടർന്ന് പലർക്കും വിദേശരാജ്യങ്ങളിൽ പോയി ആഗ്രഹിക്കുന്ന വിദ്യാഭ്യാസയോഗ്യത നേടാൻ സാധിക്കുകയും ചെയ്തു. ഇന്ത്യയുടെ ചരിത്രം പരിശോധിക്കുമ്പോൾ വിദേശരാജ്യങ്ങളിൽ പോയി പഠനം പൂർത്തീകരിച്ച പലരുംതന്നെ ഇന്നത്തെ ഇന്ത്യയുടെ രൂപീകരണത്തിന്റെ വിവിധ ഘട്ടങ്ങളിൽ വളരെ പ്രധാന്യമർഹിക്കുന്ന സ്ഥാനങ്ങളിലും നേതൃത്വങ്ങളിലും നിലനിൽക്കുകയും ചെയ്തിരുന്നു.

വർഷങ്ങൾ പിന്നിടവേ വിദ്യാഭ്യാസരീതികളിൽ പുതിയ മാറ്റങ്ങൾ വന്നു തുടങ്ങി. അതിൽ ഏറ്റവും വഴിത്തിവായ രീതികളിലൊന്ന് തന്നെയാണ് ഹോം-സ്കൂളിംഗ്.

ഇന്ത്യയിൽ ഹോം-സ്കൂളിംഗ് തിരഞ്ഞെടുക്കുന്ന മാതാപിതാക്കളിൽ വലിയ വിഭാഗവും വിദ്യാസമ്പന്നരായ മാതാപിതാക്കളാണെന്നതാണ് അത്ഭുതപ്പെടുത്തുന്ന കാര്യം.

പലവ്യക്തികൾക്കും ഹോം-സ്കൂളിങ്ങിലേക്ക് തിരിയാൻ വ്യത്യസ്ത കാരണങ്ങളുണ്ടെങ്കിലും അതിൽ ചിലപ്പോഴെങ്കിലും കുട്ടികളുടെ മോശമായ ആരോഗ്യവസ്ഥ കാരണമാകുന്നുണ്ടെന്നാലും, ഭൂരിഭാഗം വരുന്ന മാതാപിതാക്കളും ഹോംസ്കൂളിംഗ് തിരഞ്ഞെടുക്കുന്നതിന് കാരണം നിലവിലുള്ള സ്കൂളിംഗ് സിസ്റ്റത്തിൽ നിന്ന് മാറി കൂടുതൽ സ്വാതന്ത്രത്തോടെ, പഠനം ആസ്വദിച്ച് മുന്നോട്ട് പോകുക എന്ന ഉദ്ദേശത്തിൽ തന്നെയാകുന്നു.

തന്റെ മക്കൾ സംസ്ഥാനത്തെ ഏറ്റവും മികച്ച സ്കൂളിലാണ് പഠിക്കുന്നതെന്ന പൊങ്ങച്ചം ഒഴിവാക്കി എന്റെ മകനോ/മകളോ/മക്കളോ ഹോം-സ്കൂളിംഗ് ആണ് നടത്തുന്നതെന്ന് അഭിമാനത്തോടെ പറയുന്ന മാതാപിതാക്കൾ മുന്നോട്ട് ഏറെ പ്രതീക്ഷ നൽകുന്ന സമൂഹത്തിന്റെ ഭാഗം തന്നെയാണ്.

ഹോം-സ്കൂളിംഗിന്റെ ഭാവി

ഹോം-സ്കൂളിംഗ് രീതിയിൽ പഠനം തുടർന്നാൽ കുട്ടിയുടെ ഭാവി എങ്ങനെയാണ്, ഇങ്ങനെ പഠിച്ചിട്ടെന്താണ് കാര്യം, കുട്ടിയുടെ ലേണിംഗിനെ എങ്ങനെ അളക്കും, ഭാവിയിൽ എങ്ങനെ കോളേജിൽ അയക്കും, അഡ്മിഷൻ കിട്ടുമോ, ഈ പഠനരീതിയ്ക്ക് വല്ല വാല്യൂവും ഉണ്ടോ എന്നിങ്ങനെയുള്ള നൂറ് ആശങ്കകൾ മാതാപിതാക്കളിൽ ഉണ്ടാവാം. എങ്കിൽ നിങ്ങൾ അറിയുക- ഇന്ത്യയിൽ ഹോം-സ്കൂളിംഗ് നിയമ വിധേയമാണ്.

ഹോംസ്കൂളിംഗ് തിരഞ്ഞെടുക്കുന്നത് നിങ്ങളുടെ കുട്ടിയുടെ ഭാവിയെ ബാധിക്കുമോയെന്ന ഭയമൊട്ടും തന്നെ വേണ്ട. പല ബോർഡുകളിൽ ICSE, ISE, CVE, IGCSE, NIOS എന്നിങ്ങനെ വ്യത്യസ്തങ്ങളായ നാഷണൽ, ഇന്റർനാഷണൽ ബോർഡുകളിലും, സംസ്ഥാന ബോർഡുകളിലും വിദ്യാർഥികൾക്ക് തത്തുല്യ പരീക്ഷകൾ എഴുതാവുന്നതാണ്. വിജയിക്കുന്ന കുട്ടികൾക്ക് പത്തിന് ശേഷം ഹയർ സെക്കണ്ടറി റെഗുലർ ക്ലാസുകൾ അറ്റൻഡ് ചെയ്ത് സ്കൂളിൽ പോയി പഠിക്കുന്ന രീതിയിലേക്കും, ഹയർ സെക്കണ്ടറി വരെ ഹോം-സ്കൂളിംഗ് ചെയ്ത ശേഷം പരീക്ഷ വിജയിച്ച് റെഗുലർ കോളേജ് വിദ്യാഭ്യാസം നേടുന്നത്തിനുമൊക്കെ സാധ്യമാണ്.

അതുകൊണ്ട് തന്നെ കോവിഡ് കാലവുമായി ബന്ധപ്പെട്ടോ മറ്റെന്തെങ്കിലും സാഹചര്യങ്ങളുമായി ബന്ധപ്പെട്ടോ സ്കൂളിൽ പോകാൻ കഴിയാത്ത കുട്ടികൾക്കായി ധൈര്യത്തോടെ മാതാപിതാക്കൾക്ക് ഹോം-സ്കൂളിംഗ് തിരഞ്ഞെടുക്കാവുന്നതാണ്.

വിദ്യാർഥികളുടെ പഠനവും പെർഫോമൻസുമായി ബന്ധപ്പെട്ട മറ്റ് പ്രശ്നങ്ങൾക്ക് സൈക്കോളജിസ്റ്റിന്റെ സേവനം ഏത് സമയത്തും തേടാവുന്നതാണ്.